بكلّ يوم، ومع كلّ لفحة ضَوّ من نورك يا ربّ، منتأمَّل بِحُبَّك الكبير اللي بتفيضو خير وبركة عالبشريِّة كلّها اللي خلقتا بكلمة منَّك يا إله السما والأرض.
كلّ يوم بهالصيام المبارك، بتدعينا تا نرافقك يا ربّ بكلّ رحلاتك حتَّى نسمع تعاليمك ونستقي من كلمتك المليانة حياة وسلام وفيها خلاص لنفوسنا.
منرافقك يا ربّ حتَّى نشهد عالآيات والعجايب اللي عم تعملا حُبًّا بالإنسان المتألِّم، وتشيل الأرواح النجسة من الممسوسين وتشفي المرضى وتحط إيدك عا كلّ المحتاجين وتغيِّرُن بِحُبَّك.
منرافقك يا ربّ تا نشهد ونعرف ونأكِّد على إنَّك قدّوس وإبن الله اللي تجسَّدِت وجيت على عالمنا تا تعطينا الخلاص، وبقيت معنا بالقربان المقدّس وبالأسرار تا تأكِّدلنا على مدى حُبَّك الكبير اللي بتحبنا ياه.
بدنا نشكرك يا ربّ، ونحاول دايماً نتابع المسيرة معك لعند كلّ إنسان بحاجة للمسة حُبَّك وحنانك من خلالنا.
