كلّ الخليقة بتسبّحك يا ربّ بهالصباح المبارك، وبتمجّدك وبتشكرك عا كلّ نِعَمَك وعطاياك اللي بتفيضا بهالنهار اللي بتشرُق فيه نورك علينا.


برسالتك اللي عِشتا معنا عالأرض يا ربّ، كنت كلّ يوم تشتغل تا تخلِّص الإنسان ، كل إنسان ، وتحرِّرو مِن وهم المظاهر والخداع والمصالح.


هالإنسان اللي خنقو الحسد، بلَّش يضطُهدَك لأنَّك كِنت عم بتعلّمو وتدعيه تا يعيش التواضع فيك، وتكون إنتَ وحدك الحقيقة وطعامو اليومي.


حتّى قرايبينك يا يسوع ما فِهمو عُمق إلتزامَك بالحُبّ اللي خلّاك تتنازل عن عرشك وتتجسَّد وتصير متلنا كرمال تخلِّصنا.


ما بدنا نغرق بوحل العالم وسخافاتو يا ربّ، ولا بدنا نكون فارغين بجوّاتنا، بدنا نكون معك يا إلهنا الحبيب نستقي مِنَّك يا نبع الحياة.

/الخوري يوسف بركات/