بصباح هالنهار، اللي فيه الخليقة كلّا فرحانة بظهورك يا ربّ عليها بوقت العماد، منرفعلك التسبيح والمجد والشكر والإكرام يا إلهنا الحبيب.

منشكرك يا ألله الآب لأنَّك بعتِت يوحنّا المعمدان تا يهيّء الطريق للربّ يسوع وكان الصوت الصارخ اللي عم يدعي للتوبة وللإستعداد لمجيء المُخلِّص.

الشكر لإلك كمان يا ألله الآب لأنَّك بعتِت الروح القدس عا شكل حمامة، وخلَّيت العالم كِلّو يسمع صوتَك، صوت الرضى على رسالة الخلاص اللي رح يتمِّما.

الشكر لإلك يا ألله الإبن اللي دلّ على يوحنّا المعمدان وأعلن إنَّك الحمل اللي جايي تا يرفع خطيِّة العالم.

الشكر لإلك لأنَّك إفتديتنا بذاتك تا نتِّحِد فيك ونصير فيك أبناء لبيَّك اللي بالسما.

الشكر لإلك لأنَّك شبَّعتنا جسديًّا بالخبز الأرضي اللي كسرتو، وروحيًّا بجسدك ودمك اللي سفكتن كرمالنا عالصليب.

الشكر لإلك يا ألله الروح القدس لأنَّك بتضلَّك حاضر وناطر إشارتنا تا تقوّينا عا كلّ أعمال الشرّ والأشرار.

/الخوري يوسف بركات/