بهالأحد الفارح اللي فيه عم نفوت معك عا أورشليم منتصر عالخطيِّة والموت، منرفعلك كلّ التسبيح والمجد يا إله السما والأرض.
اليوم مُميَّز للشعب الفقير المسكين يا يسوع لأنّو يوم إعلانَك الملك الجايي تا يخلِّصُن من الخطيِّة، ونحنا فرحانين كمان يا ربّ بهالنهار لأنّو يوم إنتصارك على خطايانا اللي منرفعلك ياها، وعلى ضعفنا اللي بيتحوَّل لقوِّة فيك ومعك يا إلهنا الحبيب.
اليوم رح نصرخلك هوشعنا متل كلّ يوم بصلاتنا، ولكن اليوم الهوشعنا فيها نكهة أجمل ، وهيّي نكهة الإنتصار معك عالتجارب اللي رح تعترضنا يا مُخلِّصنا.
اليوم رح نصرخلك مبارك أنت يا يسوع الجايي من عند الآب تا تعطينا الحياة بملآا، ومعها منتغلَّب عالخطيِّة وشهواتا.
اليوم منصرخلك هوشعنا يا ربّ ومندعيك تا تفوت وتملُك عا قلوبنا وتحوِّلا لمسكنك الدايم.
