مع بداية هالأسبوع العظيم، الأسبوع اللي فيه منتذكّر فيه قدَّيش تعذَّبت وحملت أوجاع حُبًّا فينا يا إلهنا ومخلِّصنا يسوع المسيح.
يا ربّ، من بعد ما مجَّدَك وسبَّحَك الشعب بإحتفال عظيم وقتا فتت عا أورشليم فوتة الملوك، تركتن كلُّن وتركت مجدُن الزايف والباطل لأنَّك عارف إنُّن رح يلحقو الفرّيسيّين وهنّي ذاتن رح يرجعو يطالبو بصلبك.
يا ربّ، بهالنهار إنتَ حسَّيت بالجوع، بس مش جوع الأكل، وإنّما الجوع لإنَّك تخلِّص الإنسان، المتمثِّل بالتينة، من عقمو ومن خطيتو، بصليب الحبّ.
عظيم إنتَ يا ربّ لأنَّك بيَّنت الحقيقة اللي بتقول إنّو ما في حياة إلّا مِنَّك وفيك، إنتَ اللي غلبت الموت وكشفت عن العقم اللي بالإنسان وعطيتو الحياة من فيض حُبَّك اللامتناهي.
يا ربّ، نحنا إخترناك قائدنا الأوحد، وبدنا نمشي معك درب الصليب على ضو نورك وحُبَّك الصافي.
