رغم العتمة اللي عم تحاول تلفّنا، ورغم الآلام والأحزان والصعوبات اللي عم تحاول تتغلَّب علينا، بيبقى نور صباحك عم يعطينا الأمل بالسلام والفرح يا ربّ.


نحنا منعرف إنّو طريق الحياة ضيِّق وصعب يا ربّ، وبيتطلَّب مِنّا الوعي الكامل والتجرُّد والتخلّي والتواضع وحتَّى الوقفة مع الذّات.


ونحنا منعرف يا ربّ، إنّو إذا بدنا نمشي هالطريق علينا إننا نمشيه بأمانة بحياتنا اليوميَّة، بدنا نموت عن ذاتنا ومجدنا تا تتمجَّد فينا وبأعمالنا.

وتا نمشي هالطريق بدنا نستعدّ منيح للقاءك، بدنا نتخلّى عن أنانيِّتنا تا نقدر نحصل عالحياة معك يا ربّ، وبدنا نعيش معك وإلك بكلّ لحظة من لحظات حياتنا.

صحيح مش هينة الطريق صوب الملكوت، بس حلوة رغم صعوباتا لمَّن بتكون إنتَ هدفنا وغايتنا وفرحنا وسلامنا يا إله الفرح والسلام.

/الخوري يوسف بركات/