ما في أجمل من الصباح اللي منفتِّح عيوننا فيه عا نورك يا ربّ ونعرف إنَّك كنت سهران علينا بالليل وبعدك معنا ورح تبقى لآخر العمر حدنا.


بهالعيد المبارك اليوم، عيد الإفخارستيّا اللي كرَّستو يا ربّي يسوع لمَّن عطيتنا جسدك ودمك زاد لحياتنا، منتأمَّل بالرسل كيف حملو هالوديعة وانطلقو تا يخبّرو العالم عنَّك ويعطوهن أجمل وأطيب زوّادة لحياتُن الجسديِّة والروحيِّة.


بهالعيد المبارك اليوم، نحنا متشوقين يا يسوعنا الغالي تا نبرم بالقربان ونزيّحك بالساحات ونرفعلك أجمل الألحان وتبارك بيوتنا وأرزاقنا وعائلاتنا يا إلهنا الغالي.

بهالعيد المبارك اليوم، منتأمَّل بهالقربانة ومفعولا العجيب اللي بيعطي الحياة لكلّ إنسان بيُطلبا بإيمان.

مين بيصدِّق إنّو خبزة صارت جسد وخمرة صارت دم؟

بس مش حيَلّا جسد ودم، هودي جسدك ودمك يا إلهنا وملكنا ومخلِّصنا يسوع المسيح اللي بتعطينا الحياة.

/الخوري يوسف بركات/