مع الملايكة والسما والدني كِلّا، الفرحانين بقيامتك يا يسوعنا الحبيب من بين الأموات، منرفعلك كلّ التسبيح والمجد والإكرام.
من بعد ما ظهَرت لمريم المجدليِّة والنسوان اللي معا يا ربّ، منشوفك اليوم عم تظهر لنصّ التلاميذ اللي رجعو لماضيهن واستسلمو، تا تأكِّدلُن كلامك لمَّن كِنت تحكيلُن عن قيامتك من بين الأموات.
ومش بس ظهرتِلُّن تا تأكِّد كلامّك يا ربّي يسوع، لا بل تا تثبِّتلن إنُّن تلاميذ الملك، ورُسُل الإله الحيّ اللي حَبُّن وبذل ذاتو عالصليب كرمالُن، ومات وقام تا يعرفو إنّو الموت هوّي عبور لحياة كِلّا فرح وسلام ليَللي بيآمنو بالربّ وبيعيشو بحسب رغبة قلبو.
كلنا إيمان بإنَّك حاضر دايماً معنا يا ربّ، وعم تدعينا تا نزِتّ شبكة إيماننا بين الناس من خلال أعمالنا ونعكُس نور قيامتك بحياتنا، ونكون شهودك وصورتك بالعالم والمجتمع اللي نحنا فيه.
