يا ربّي يسوع، منتأمّل بهالسنين اللي عاشوها معك الرسل اللي اخترتن تا يبشّرو العالم بملكوتك، ملكوت السلام والفرح والمحبّة.

بالبداية سألتن عن نظرة الناس لإلك وكان الجواب بديهي إنّك تكون لإلن نبي لأنن بيفكرو تفكير بشري، ولكن بالنسبة للرسل، وبلسان بطرس إنت المسيح إبن الله الحيّ، وهيدا الجواب مش هيّن الإنسان يعطيه إذا ما كان من وحي الروح القدس.

بس هالجواب، اللي عطاه مار بطرس الرسول يا ربّ، بيبقى ناقص لانّو بيتطلّب إلتزام، وهالإلتزام تترجم لحضور دايم معك رغم الضعف البشريّ اللي عاشو وخصوصي وقت الآلام.

يا ربّي يسوع، إنت هوّي المسيح إبن الله الحيّ، وعلى هيدا الإيمان أسّستِلنا الكنيسة، ورح تبقى قائد سفينة حياتنا ورأس كنيستنا وإلهنا وحبيبنا.

/الخوري يوسف بركات/