إنت النور اللي بتشرق منّو الشمس يا ربّ، وإنت الحياة اللي بتتنفّسا الخليقة يا إله السما والأرض، منشكرك ومنسبّحك على هالنهار المبارك.
يا ربّي يسوع، من أجمل التعاليم اللي بتعلّمنا ياها بإنجيلك هيّي الرحمة، وخصوصي رحمة الله الآب اللي دايماً ناطرنا تا نجي لعندو بفعل توبة حقيقيّة وندامة صادقة، ونقدّملو خطايانا تا يغسلّنا منها ونرجع لحالة البرارة اللي خلقنا فيها.
يا ربّي يسوع، قدّام قسوة الإنسان عا خيّو، منوقف مدهوشين بحسرة، ومنتأمّل بكلامك اللي بتدعينا فيه إننا نكون رحومين، ونشكر الله لأنّو محالنا صكّ الخطيّة اللي فينا، وحمل عاهاتنا عا كتافو متل ما حمل الصليب.
اعطينا النعمة يا ربّ، تا نعرف نغفر ونرحم إخوتنا الحقيقيّين، ونعيش معن سلامك اللي ما إلو حدود.
/الخوري يوسف بركات/
