إلك بيليق التسبيح والمجد والإكرام من كل الخليقة اللي كوّنتا يا إله السما والأرض، وكل الشكر منقدّملك ياه بهالصباح المبارك على العطايا اللي عم بتفيضا علينا.
يا ربّي يسوع، إنت الحق والحياة، وكلامك هوّي الطريق اللي بيودّينا للملكوت، وقدّيش إيام منضيّع البوصلة ومنصير نفتّش عا طريق سهل يدغدغلنا مشاعرنا ويضيّعنا بمتاهات الحياة ونتناساك.
ومتل ما قتل الكتبة والفرّيسيّين يوحنّا المعمدان اللي كان صوت الحقّ اللي كان يزعج إستقرارن بالخطيّة، هيك نحنا أوقات منقتلك بتحوّلاتنا ومنحاول نستغلّك ونقتل صوت الضمير اللي فينا.
وإذا كان علينا إننا نختار، منطلب منّك إنّك تعطينا يا ربّ النعمة تا نتشبّه فيك ونموت عن ذاتنا بالصوم ونعيش فيك بالصلاة، ونتحوّل بهالصوم من ناس أنانيّين لناس عايشين المحبّة لدرجة بذل الذات تا نستحق إننا نستقر فيك.
/الخوري يوسف بركات/
