صباح المحبة والمسامحة والغفران هوي صباحك اليوم يا رب.
بشوفك يا رب اليوم عم بتعلم الفريسيين والكتبة كيف بتكون المغفرة.
بشوفك يا رب عم تستقبل العشارين والخاطيين تا يسمعو كلمتك اللي فيها حياة، ويرجعو عن ضلالن ويتوبو.
بشوفك يا رب مليان رحمة وعم تدعيني تا عيش الرحمة مع خيي الإنسان.
بشوفك يا رب مليان سلام تا تعطي السلام بقلوب هالضعاف وتزرعو بقلبي أنا اللي عم فتش عا سلامك.
بشوفك يا ربّ عم تغيّر بالفكر اليهودي المتشدّد واللي بيألّه الشريعة ويطبّقا حرفيّا، بينما جيت يا رب تا تقلنا إنّو همّك الإنسان ومش الشريعة.
وأنا يا رب دوري إنّي آخدك مثال وإمشي بكلامك وأنطلق صوب خيي الإنسان اللي بحاجة للمسة حنان وعرّفو عليك إنّك المحبة والمغفرة.
/الخوري يوسف بركات/
