يا ربي يسوع، مع إشراقة الصباح، وبعد مسا وليل طويل مؤلم من ورا الإنفجار، بشوفك بكل إنسان ترك هالدني، عم تحملو بقلبك لبيّك السماوي.
عم شوفك بكل إنسان إنصاب، عم تعطيه أمل جديد بحياة جديدة معك.
بشوفك عم تزرع عا وجوه الناس اللي عم تهتم وتساعد، بسمة الرجا تا يعكسوها لغيرن.
أنا كلني إيمان ، يا ربّ، إنّك عم تحضّرلنا لقاءات متنوعة، وتدعينا تا نغرف من خلالا ثمار من روحك القدوس.
أنا أكيد، يا رب، إنّك رح تحقّقلي طلبي وتعطي نعمة الصبر لأهل الشهدا والمجروحين والمتألمين من هالإنفجار، تا ما يضعفو قدام هالمصاب الأليم.
أنا أكيد بهالنهار إنك رح تعطيهن نعمة تحمل هالمصيبة اللي عم بتحاول تزعزع محبتن إلك.
أنا كلني ثقة، يا رب، إنّك رح بتوسّع المساحة بقلوبن تا حتى يتمكنو من إنن يستوعبو كل التحديات اللي رح بتواجهن، من دون ما يضعف حبّن لإلك وتعلّقن فيك.
/الخوري يوسف بركات/
