صباحك كلّو نور يللي عطيتنا النور، ربّي يسوع المسيح.
ما بقدر شوفك يا ربّ، متل القاضي الظالم لأنّك كلّك رحمة وحنان.
ما فيك إلّا ما تكون الرحمة بذاتا، إنت اللي رحمت الخاطية والمجنون وكلّ المرضى.
ما فيك إلّا ما تكون المحبّة بذاتا، إنت اللي حبّيتني للنهاية، للموت عالصليب.
ما فيك إلّا ما تكون السلام بذاتو، إنت اللي زرعت السلام بقلوبنا.
ما فيك إلّا ما تكون التواضع بذاتو، إنت اللي تنازلت وصرت إنسان تا تخلّص الإنسان.
ما فيك إلاّ ما تكون القاضي العادل الرحوم والمحبّ، إنت اللي تخلّيت عن مجدك وتشبّهت فيّي أنا الإنسان بكلّ شي ما عدا الخطية.
صلاتي وطلبي منّك يا ربّ إنّي إبقى معك، وضلّ حِبّك وإعبدك ومجّدك وسبّحك لآخر نفس من حياتي.
/الخوري يوسف بركات/
