صباح الحكمة والنعمة هوي صباحك يا ربّي يسوع المسيح.
شو ضعيف بالإيمان الإنسان اللي دايماً بيطلب آيات تا يآمن فيك يا ربّ.
ومع هيك، اليوم قبل التحدي وعطيت الكتبة والفريسيين آية يونان اللي بعتو الله تا يدعي أهل نينوى للتوبة.
ما كانت قيامتك يا ربّ هالشي العظيم متل ما كان بدن الكتبة والفريسيين.
ما ظهرتلن تا تتحدّاهن، ظهرت للبسطا اللي آمنو فيك تا تشدّدن بإيمانن وتثبّتن فيك.
ونحنا أوقات كتير متل الفريسيين بدنا ياك مسيح ظافر، جبّار، بتجازي بهالدني كل اللي رافضينك.
بس منطقك يا ربّ غير منطقنا، ما بتجبرنا نآمن فيك من خلال العجابب الخارقة، لا بل بتطلب منا نآمن بقلب مفتوح عا رحمتك.
واليوم رح نعمل فعل تجديد لإيماننا فيك من خلال سماع كلمتك ونشتغل عا تتميم إرادتك بحياتنا.
/الخوري يوسف بركات/
