صباحي معك يا يسوع بهالأسبوع هوي صباح الوحدة.
متل سمعان بطرس، اللي التقى فيك عند بحيرة جناشر، منعترف يا رب بضعفنا.
ومتل سمعان بطرس منحاف نجي لعندك لأننا خاطيين وبدل ما نقرّب صوبك منصير نبعد.
ومتل سمعان بطرس، قدام محبّتك يا رب اللامحدودة منصير نحسّ عا حالنا اننا ما منستحق رحمتك.
بس انت يا ربّ ما بتفكّر تفكيرنا، ما بتتوقّف عند ضعفنا وخطيتنا، لا بل بتدعينا تا نترك الحياة السابقة، المليانة ضعف وتعلّق بالارضيات، ونتحوّل معك لرسل نعرف نصطاد الناس لإلك، ومن اشخاص عم نبرّم كيف بدنا نرضي رغباتنا وشهواتنا وأناتياتنا، لتلاميذك هدفنا ندعي الناس، من خلال اقوالنا وافعالنا اللي بترضي مشيئتك، للخلاص فيك.
وباسبوع الصلاة كرمال تتوحّد الكنيسة وكل المسيحيين، منصلّي تا نكون جماعة واحدة نعرف نزيّن مسيحيّتنا بالتواضع والصبر والثقة والتعاون، ونتّكل عا عمل روحك القدّوس فينا.
/الخوري يوسف بركات/
