أحلى وأغلى صباح هوي صباحك المليان فرح وسلام يا رب.
بشوفك بالكلمة وبسمعك بالنسيم العليل عم بتنبهني من التجديف عا روحك القدّوس.
كيف بقدر جدّف عالروح القدس اللي من وقت اللي خلقت علّمني وبعدو عم بيعلّمني كيف حبك؟
كيف بقدر جدّف عالروح القدس وهوي الله الحاضر معي بكل لحظات حياتي؟
كيف بقدر جدّف عالروح القدس وهوي اللي بيدافع عني بوقت الصعاب والتجارب؟
كيف بقدر جدّف عالروح القدس وهوي اللي بينفح فيي عطايا ومواهب ما بتنعد تا حقق مشيئتك بالحياة: خلاص النفوس؟
تعا يا روح الله، روح المحبة، وازرعني شتلة حب بحقل هالعالم المليان بغض.
ازرعني نبتة فرح وسلام بهالعالم اللي ما بقا يعرف السلام.
فيك يا روح الله القدوس بلاقي الراحة اللي بتوصلني لعالم الأمان ، عالم الرب.
/الخوري يوسف بركات/
