بسبّحك وبمجّدك يا ربّ بهالصباح المبارك اللي فيه عم تدعيني تا تفوت عا قلبي متل ما طلبت من زكّا العشّار.
بتأمّلك يا ربّ عينيك عليّي وين ما رحت وكيف ما عملت وعم تقلّي تا إنزل من عليائي وإجي لعندك لأنّو عندك الراحة.
بتخيّلك عم تسألني أيمتى رح إتوصّل إني كون متل زكّا وزّع كلّ المواهب والعطايا اللي عطيتني ياهن تا إخدمك فيون بحياتي؟
بتخيّلك عم تسألني أيمتى رح إتوصّل إني كون متل زكّا العشّار إتخلّى عن مجدي تا إربح الملكوت وكون معك يا ربّ؟
بتخيّلك عم تسألني أيمتى رح إتوصّل إني كون متل زكّا العشّار شوفك وإخدمك بالفقير.
بتخيّلك عم تسألني أيمتى رح إتوصّل إني كون متل زكّا العشّار عم إطلب المسامحة من كلّ اللي أذيتن بكلام جارح عن قصد أو غير قصد؟
مع زكّا العشّار بقلّك يا ربّ رح إسعى تا شوفك وإركض لعندك وحط حالي بين إيديك وقدّملك محصول الوزنات اللي تاجرت فيون.
/الخوري يوسف بركات/
