مع كل إشراقة شمس بسبّحك ويمجدك يا إلهي الحبيب.
بهالصباح المبارك، عم تدعيني يا ربّ تا أعرف ميّز إرادتك بحياتي أنا الإنسان.
أعرف ميّز بين زمانك وزماننا نحنا.
ياما أوقات كتير بنطر علامة زمنيّة تا أعمل شغلة أرضيّة بينما العلامة السماوية اللي بتعطيني ياها كل يوم (كلمتك) ما عم باخد فيا تا إمشي بطريق التوبة.
عم تدعيني اليوم يا ربّ تا أعرف ميّز الصديق السيّء اللي رفقتو ممكن تودّيني لطريق الغلط ولخسارة نفسي ومن بعدا للهلاك، من الصديق المنيح اللي صداقتو بتريّحني نفسيًّا وروحيًّا وبتقرّبني منّك.
ربّي يسوع، سعادتي هيّي معك ورح حاول كون على إستعداد إنّي إسمعك وأعمل بمشيئتك لأنّي بعرفك بتحكّيني بكلّ الطريق، إن كان بحدث صغير أو حتى من خلال إنسان أو بكلمة عابرة.
/الخوري يوسف بركات/
