صباح القداسة هوّي صباحك اليوم يا ربّ السما والأرض.
بهالأحد المبارك بتنبّهني يا رب تا ما كون أرض ما إلها أصل، ولا أرض صخريّة ولا حتى أرض فيها شوك.
لا بل عم تدعيني تا كون هالأرض الجيدة والصالحة.
وأنا رح أعمل جهدي، يا ربّ، تا ما كون متل هالأرض اللي عا جانب الطريق وإسمح لتجارب الشيطان ما تخلّيني إتأمل بكلمتك وعيشا.
رح أعمل جهدي تا ما كون متل هالأرض الصخريّة ما بلحّق إسمع كلمتك إلّا وبنساها بسرعة وما بتثمر فيّي.
رح أعمل جهدي تا ما كون متل هالأرض المليانة شوك الأنانيّة والشهوة واللذة وهموم الحياة اللي بتقتل كلمتك فيي.
رح حاول، كلّ حياتي، خلّي قلبي وفكري ولساني يكونو هالأرض الجيدة والصالحة إستقبل كلمتك بفرح، يا ربّ، وعيشا وأعمل فيها تا تثمر حياة بالآخرين.
/الخوري يوسف بركات/
