بصباح هالأحد الأوّل من بعد القيامة، واللي فيه عم نعيّد عيد رحمتك يا ربّ، منرفعلك كل التسبيح، ومنشكرك عا كل نعمك وعطاياك وخصوصي عا محبّتك ورحمتك اللي بتفيضن علينا.
ربّي وإلهي، من أوّل ما منخلق والتساؤل والشكّ موجودين بحياتنا، وكتير من الأبرار والقدّيسين شكّو بفترة من حياتن، بس إنت يا ربّ ما عاقبت ولا بتعاقب حدا ولو كان قليل الإيمان، لا بل بتحقّق وعدك فينا رغم كل شي عم نعملو فيك، لأنّك صادق وبتدعينا للصدق.
قدّام دعوتك لإلنا للقداسة يا ربّ، بعدنا عم نتراجع ونتحجّج بإنّو القداسة مستحيلة، وإنّك بعيد عن الظهورات بهالإيام الصعبة لهيك منتعب.
اليوم، بدنا نحاول قد ما منقدر إننا نثبت فيك من خلال ظهورك اليومي بالذبيحة الإلهيّة اللي منعيشا بكل قدّاس.
بدنا نشيل الشكّ من فكرنا، ونشرّع بواب قلوبنا تا تدخل عليها وتنقّيها وتبقى ساكن فيا للأبد.
/الخوري يوسف بركات/
