الجمال كلّو إنت يا ربّ، والبشريّة كلّها بتفرح لمّا بيشرق نورك عليها، والأفواه والألسن بتسبّحك وبتمجّدك يا إله الكون القايم من بين الأموات.
بعد كل هالوقت الطويل اللي عاشوه التلاميذ والشعب معك يا ربّ، ومن بعد كل العجايب اللي عملتا حبّاً بولادك، بقيو يحلمو بملك يأمّنلن الخبز المادي تا يبقو قاعدين وما يشتغلو.
هون تدخّلت يا رب تا توعّيُون وتوعّينا إنّك وحدك الطعام الباقي للحياة الأبديّة.
كل هالشعب لحقك ومشي وراك يا ربّ لمن ما لقيك عالشط، وبقي متابعك بكل محطة كنت تبشّر فيها بملكوتك، ملكوت المحبّة والسلام.
ونحنا كمان، بكتير من الأوقات ما منعيد نشوفك إلاّ اللي بدو يحقّقلنا طلباتنا، ومننسى إنو الطلب الرئيسي والوحيد هوي حبّك لإلنا وحبّنا بعضنا لبعض تا نقدر نحصل عالحياة الأبديّة.
ساعدنا يا يسوع تا نتبقل ضعفنا، ونمشي معك الدرب اللي مشيتا مريم، ونعمل مشيئتك كل حياتنا.
/الخوري يوسف بركات/
