منرفعلك يا ربّ كل التسبيح والمجد والإكرام ، ومنشكرك على حضورك الدايم بحياتنا.
كيف يا ربّي يسوع، في عالم بتحبّ الظلمة عالنّور؟ كيف في عالم بتفضّل الباطل عالحقّ؟ كيف في ناس بتقبل بالكذب وبترفض الحقيقة؟
جوابك يا يسوع واضح لتلاميذك ولإلنا، وهوي إنّو لأنّن بدّن يعيشو بالظلمة المليانة خطيّة، وبيحبّو يخبّو عاهاتن بتملّق تا يربحو هالعالم الزايل وملذّاتو.
هودي مش ولاد الحق والحقيقة، هودي أبناء وبنات قدر يلعب بعقولن الشرّير ويبعّدن عنّك يا ربّ لأنّك إنت الحقّ والحقيقة والنّور.
بهالحياة المليانة من نورك، بدنا نعيش يا ربّ، ونمتلي من روحك القدّوس، ونكون عم نعرف نعيشك بالعالم ونكون شهود لحقيقة قيامتك فينا وبالعالم، ونعكسا نور لكل إنسان منلتقي فيه بحياتنا.
/الخوري يوسف بركات/
