الصبح إلك والمجد إلك والتسبيح إلك يا إله الآلهة وربّ الأرباب، ومنشكرك عا نورك اللي بتشرقو علينا مع بداية كل يوم.
يا ربّي يسوع، إنت النور الحقيقي اللي بيشرق عا حياتنا اليوميّة، بس نحنا أوقات منحاول نطمر هالنور اللي فينا بشويّة خطايا ما إلن منفعة بحياتنا الروحيّة، وأوّلن الـ "أنا" اللي بتُحاول تتملّك عا حياتنا اليوميّة.
يا ربّي يسوع، شو بتنفع الحياة من دونك؟ ومن دونك بتغيب شمس الحياة، وبتسوَدّ الدني وبتحلّ ظلمة الخطيّة فينا، ومنصير ننهش ببعض وما منعود نشبع من هالدني ومن شهواتا وملذّاتا.
يا إلهنا الحبيب، بنهاية المشوار وبس تنطوي صفحة حياة كل واحد وواحدة منّا، وحدو نورك اللي بيبقى ساطع يا ربّ، لو شو ما صار، تا ينوّرلنا الطريق اللي بتوصّل لعندك إذا كنّا متحضّرين، ونحصل عالملكوت.
/الخوري يوسف بركات/
