بهالصباح المبارك، منرفع قلوبنا وعيوننا وأفكارنا صوبك يا ربّ السما والأرض تا نشكرك عا حضورك الدايم والحقيقي معنا بكل لحظة من يومياتنا.
بعد قيامتك من بين الأموات وصعودك للسما يا يسوعنا الغالي، تا فهم التلاميذ، وخاصة الرسل منن، إنّك إنت والآب واحد.
من بعد صعودك للسما يا ربّي يسوع تا عرف التلاميذ إنّك والآب واحد وإنّو إرادتك هيّي إرادة الله الآب، وإنّو إرادة الآب هيي إرادتك.
ونحنا منآمن فيك يا يسوع الحبيب، وبإنّو إرادتك هيّي خلاصنا، بس المشكلة فينا نحنا لأنّو أفعالنا ما عم تعكس هالإيمان.
رجانا فيك يا ربّ، وبروحك الحيّ والمعزّي والقدّوس إنّك باقي معنا بكل أحداث حياتنا لأننا أحبابك وصنع إيديك، ورح نسعى دايماً إنّو ما نخلّي شي يفصلنا عنّك.
/الخوري يوسف بركات/
