ببداية هالأسبوع المبارك، وبصباح هالنهار الفارح، منرفعلك يا رب كل التسبيح والمجد.

يا إلهنا الحبيب، إنت اللي عطيتنا الحياة بملآا ودعيتنا على إننا نعيشا بفرح، جينا نحنا بضعفنا البشري شوّهنا صورتك وقتلنا الحياة.

وكل ما فتنا بالعمق معك يا ربّ، كل ما قويت التجارب علينا، وكل ما حاول الشرير إنّو يغوينا بحبّ الذات والملذّات اللي بتمجّد الـ "أنا" فينا وبتخلينا نكون نحنا مركز القرار.

يا ربّ، ما بدنا نكون من هالأشخاص اللي بيعرفو يقرو العلامات الأرضيّة وما بيعرفو يلمسو العلامات، وبيغيب عن بالن كلامك اللي فيه روح الحياة.

علّمنا يا ربّ إننا نعرف نقرا علامات حبّك بحياتنا، ونحقّق الهدف إنّك تكون أساس حياتنا ودعوتنا، ونقدر نوصل لإلك ونتّحد فيك ونوصّلك للآخرين.

/الخوري يوسف بركات/