مع كل نسمة هوا، ومع كل طلعة شمس، ومع كل بصيص نور، منرفعلك كل التسبيح يا إله الخير والربّ الحنون والمعلّم الرؤوف.

يا يسوع الحبيب، إنت النور اللي بيضوي بهالعتمة اللي عم تحاول تغلّف وطننا اللي تعب من الخطيّة ومعالما، وبعدا عم بتحاول إنها تطفي النور اللي فينا، بس ما رح تقدر لأنو روحك القدّوس هوي اللي ساكن فينا وهوي اللي بينجينا من كل تعلّق بهالدني ومغرياتا ومن كل إستسلام لشهوات الخطيّة.

يا يسوعنا الحبيب، شو بدنا أجمل من حضورك بحياتنا، إنت اللي سفكت دمّك عالصليب حبّا فينا، وإنت اللي عطيت وبعدك عم تعطينا أهميّة إننا نكون رسل تبشير بقيامتك وعلامة حضورك عا هالأرض؟

إلك يا ربّ منرفع أصواتنا ومنعلن إننا رح نبقى معك ونسعى إننا نقوم من عتمة الخطيّة ونبقى لإلك كل العمر.

/الخوري يوسف بركات/