يا بيّنا السماوي، إنت اللي خلقتنا بمحبّة حقيقيّة تا نعيش ونتنعّم معك بمجدك.

يا ربّ السما والأرض، إنت اللي ميّزتنا عن باقي المخلوقات بالحريّة والكرامة، ولمّن بلّشنا نهملا وما نستثمرا وإخترنا الموت وتركناك، ما قبلت إنّنا نضلّ بالحياة الغلط اللي عم نعيشا، بعتلنا إبنك الحبيب يسوع، وتجسّد وصار إنسان متلنا، وتحمّل الآلام والعذاب والموت المرّ كرمالنا وعربون لرجعتنا لحضنك الأبوي، وتحضير للدعوة للعرس الأبديّ.

أعطينا يا ربّ إننا نكون مستعدّين لهالفرح اللي دعيتنا لإلو بالإيمان الكامل فيك، تا نقدر نعيش الفرح بهالحياة الصعبة اللي ما فيها فرح، ونحط السلام بقلوبنا وبقلوب الآخرين مطرح ما عم نفقد السلام الحقيقي، ويكون زيت أعمالنا اللي بتمجّدك، فايض ونتشاركو مع كل اللي منلتقي فيون.

/الخوري يوسف بركات/