بصباح هالنهار اللي فيه عم نتذكر الإنجيليّين الأربعة منسبحك و منمجدك ومنعظمك يا إله المحبّة.
يا ربّي يسوع، كتير من الإيام منوقع بتصرفات ما بتليق فينا ومنصير نتهرّب من المسؤوليّة ومنحط الحق إمّا عالوضع أو عالظروف أو عالآخرين وحتى منحط الحق عليك وما منعترف بضعفنا وبخطيتنا.
واليوم بالتحديد هوّي محطة تا نتوقف فيا قدّامك وقدّام ذاتنا يا ربّ ونسأل حالنا عن مدى تعلّقنا فيك وحبنا لإلك وقربنا منّك.
اليوم متّى الرسول بيسألنا ويننا من الإيمان فيك.
اليوم مرقس عم يسألنا لأي مدى عنا هالإندفاع صوبك.
اليوم لوقا الإنجيليّ بيسألنا عن مدى عمق رسالتنا معك.
واليوم يوحنا الحبيب بيسألنا إذا حقيقة منحبّك يا يسوع أو مجرّد كلمات منرددا وما منعيشا.
اليوم مع هالقدّيسين والإنجيليّين الاربعة منعلن إيماننا فيك ورح نسعى إننا نترجمو أعمال محبّة بحياتنا.
/الخوري يوسف بركات/
