ضوّى نور الصباح بهالأحد المبارك، وهلّت نعمك علينا، يا إله الكون، منسبّحك ومنعظّمك ومنباركك ومنشكرك.
يا ربّي يسوع، كلامك نور وحياة وغنى، خاصة لمّن بتعطي كل واحد وواحدة منّا وزنات ما بتنعدّ ولا بتُحصى، بس المشكلة فينا نحنا إننا بكتير أوقات منرفضا أو منتناساها أو حتّى ما منريد إننا نفعّلا بحياتنا، لأنّها ما بتناسب شهواتنا وأنانيّتنا.
يا إلهنا الحبيب، إنت اللي عطيتنا ذاتك، أجمل نعمة، وباقي معنا بكل لحظة تا تزيدنا قوّة ضدّ الشيطان اللي عم بيحاول إنّو يجذبنا لعندو بالتجارب، ونحنا بعدنا عم نستسلم لملذّاتنا وندفن نِعَمك بحياتنا.
من اليوم رح نحاول إننا نعيش حياتنا متل ما إنت علّمتنا، نحبّ ونسامح، نخدم ونشارك الآخرين أحزانن وأفراحن، ونكون أمينين لإلك نعكس حبّك للعالم، تا نستحق الملكوت السماوي معك يا يسوعنا الحبيب.
/الخوري يوسف بركات/
