مع إطلالة الشمس بنهاية هالأسبوع، منرفعلك كل التسبيح والمجد والإكرام يا رب، ومنشكرك على نعمة الحياة اللي بتفيضا فينا.
يا إلهنا الحبيب والزارع الكلمة بقلوب الناس كلّها، أوقات كتيرة عم نخلّي زؤان الخطيّة يتغلغل بحياتنا وما يخلّينا نشوف نورك اللي بتضويه علينا وعا إخوتنا اللي زرعتن عا دروبنا تا نكون صورتك بيناتن.
يا يسوعنا الغالي، الحياة معك هيي مشروعنا تا نعرف نستثمرو ونحاول نعيشو متل ما داعينا، بس زؤان الحقد والغضب والأنانيّة عم يخنق الطيبة والسلام اللي فينا وما عم بيخلينا نتهنّى بحياتنا.
دواءنا هوي فيك، وفيك وحدك يا إله المحبّة، ونحنا بدنا هالداو تا نقدر نكمّل حياتنا بإيمان وثقة إنّك حاضر دايماً معنا، وبكلّ الظروف، تا تعطينا القوّة ونكمّل مسيرة القداسة معك.
/الخوري يوسف بركات/
