صباح الخير والخيرات، والنور والأنوار، والبركة والبركات، والنعمة والنِعَم، هوي صباحك يا ربّ السما والأرض، منسبّحك ومنمجّدك ومنباركك.
يا ربّي يسوع، إله المحبّة والسلام، منقضّي كل حياتنا، نحنا البشر، عم نفتّش عن السعادة، بس الكتار مننا بيفتشو عنها بغير أماكن.
يا يسوعنا الحبيب، إنت الكنز اللي عم نفتّش عليه واللي قد ما فتّشنا وبرمنا، ما رح نلاقيه إلّا فيك، لهيك تركنا كل شي وجايين لعندك، تا تعطينا الفرح الحقيقي.
يا ربّ، رح نترك إنساننا الأرضي العتيق ونبيعو بالتوبة والتغيير تا تصير تتطابق حياتنا مع مشيئتك لأنّك إنت الغنى الحقيقي اللي ما ممكن نقدر نحصل عليه إلاّ إذا بعنا كل شي تا نشتريه.
يا ربّ، نوّرنا وملّينا منّك ومن حبّك تا نقدر نموت عن إنساننا العتيق تا نولد فيك وننما بحبّك بكل لحظة.
/الخوري يوسف بركات/
