بنهاية هالزمن، زمن القيامة، ومع إطلالة هالصباح المبارك منرفعلك يا ربّ أناشيد التسبيح والشكران.
منشكرك لأنّك حاضر دايماً معنا بكل لحظة من لحظات حياتنا، مرافقنا وناطر تا ندعيك تفوت عا قلوبنا وتسكن فيها وتمليها حب وفرح وسلام.
منشكرك يا ربّ لأنّك نزلت عا أرضنا وعطيتنا ذاتك وتألّمت وانصلبت ومتت عنا تا تعطينا الخلاص اللي فقدناه وبعدنا عم نفقدو بحرّيّتنا.
منشكرك يا ربّ لأنّك منّك إله أموات بل إله أحياء، قمت من بين الموت وشلت الموتى من مثوى الجحيم ودعيتنا تا نقوم من خطايانا اللي مكبّلتنا بحياتنا.
منشكرك لأنّك عطيتنا الحياة بملآا وعطيتنا الحرّيّة الكاملة إننا نختار بين الحياة معك أو البعد عنّك وما تدخلت.
بس نحنا منعلن انّك وحدك إلهنا وملكنا ومخلّصنا ورح نعلن إيماننا للعالم كلّو وما نخاف من شي.
/الخوري يوسف بركات/
