بتسبيحك يا الله الآب منبلش صباحنا، ومعك يا الله الإبن يسوع بيتبارك نهارنا، وفيك يا الله الروح القدس أسبوعنا بيكون مميّز، وبوجودك يا الله الثالوث إيامنا كلّا بتحلا.

بحضورك يا ربّ كل حياتنا بيكون إلها معنى، وكل أقوالنا وأفكارنا وأعمالنا عم نرفعا لتمجيد إسمك ، ولو ببعض الأوقات والمواقف عم نكون ضعاف، بس إنت يا ربّ بتعرف أعماق قلوبنا اللي ما بيملّيها إلاّ حضورك وحدك فيها.

بوقت ضعفنا يا ربّ إنت حاضر، وبلحظات ضياعنا إنت ناطر تا تنشلنا من مكايد الشرّير، بس المشكلة فينا نحنا اللي ما عم نوعا على أهميّة وقيمة إنّك تكون الأوّل والأساس بحياتنا.

ولأنّنا بدنا ياك الأساس، بدنا، وعم نسعى تا حتى يكون روحك القدّوس هوّي الدليل والمرافق والمرشد والقائد لحياتنا يا إلهنا الحبيب.

/الخوري يوسف بركات/