صباح المحبّة والفرح والسلام هوّي صباحك يا إله السما والأرض وكل ما فيها.
يا ربّي يسوع الحبيب، حبّ الله الآب الكبير لإلك، خلّاك بحالة الولادة الدايمة، إنت الحي بالآب وجعلتنا نكون أحياء فيك.
يا يسوع الحبيب، حبّك الكبير اللي حبيتنا ياه خلاك تكون حاضر تا تستجيب لطلبات أبناءك وبناتك اللي بيحبوك، حبّ ما إلو مصلحة.
هيدا الحبّ اللي عم تطلبو يا يسوع من تلاميذك ومنّا، هوي الشهادة الحقيقية والأساسية للتعبير عن إيماننا الثابت فيك قدّام كل الناس.
هيدا هوي الحبّ الحقيقي اللي بيعطينا الفرح والسلام، ومش حيللا فرح، وانما الفرح الداخلي واللي ما حدا بيقدر يعيشو اللا اللي بيكون مسلّمك ذاتو بكلّيّتا، وهيدي هيي الطريق الوحيدة تا نوصل لقلبك يا يسوع، إننا نحبّك بالآخرين متل ما إنت حبيتنا.
/الخوري يوسف بركات/
