مع بداية هالأسبوع المبارك، شو في أجمل من إنّو يشرق علينا نورك يا ربّ؟
يا يسوع الحبيب، بحياتك عا هالأرض كان طعامك إنّك تعمل بمشيئة الله الآب اللي أرسلك تا نعطينا الخلاص، وتدعينا على إننا نتمثّل فيك ونثبّت كلامك كنهج لحياتنا ورسالتنا معك.
صحيح إنّك بحياتك عا هالأرض يا ربّ شابهتنا بكل شي ما عدا الخطية تا تقلّنا وتدعينا نكون قدّيسين ونعيش بحسب إرادة الله الآب اللي خلقنا، بس المشكلة فينا نحنا اللي عم نبرم على إننا نحقّق إرادتنا الخاصة ونفضّل رغباتنا وشهواتنا على تعاليمك ووصاياك.
تعا يا روح الله وبدّد كل فكر وكل روح شرّ عم بتحاول تتملّكنا وتبعدنا عنّك، وشدّدنا بوقت الضعف، وقوّينا على إننا نعرف نعيش البرارة فيك بكل أمانة تا نستحق الجزاء الصالح اللي محضّرو لكلّ اللي بيحبّوك.
/الخوري يوسف بركات/
