منرفع كل أفكارنا وعقولنا وقلوبنا صوب السما مطرح ما عم يشرق نورك علينا يا ربّ بهالصباح المبارك، ومنشكرك عا حبّك اللي ما بينتهي اللي حبّيتنا ياه.
تا نكون مثل صالح للآخرين، مسؤولية كبيرة علينا يا ربّ، ومع هيك نحنا بدنا ياها، لأننا بدنا نشبهك إنت المعلّم والربّ اللي عشت بيناتنا بتواضع ما إلو مثيل.
ما بدنا نعيش بإزدواجيّة، نعلّم تعاليمك ونعيش بخلاف ما بتوصّينا فيه، نعلّم ونخبّر الناس كيف إنت الإله تجسّدت وصرت متلنا إنسان تا تخلّصنا، ونحنا منكون عم نعيش التكبّر والتسلّط والفوقيّة مع الآخرين.
ما بدنا نكون يا ربّ سبب شكّ، بأعمالنا وطريقة حياتنا، لكل إنسان بيلتقي فينا لا بل بدنا نكون أبناء النور، نعيش حياتنا متل ما بتدعينا إننا نكون نور العالم وملح الأرض، هالأرض اللي ناطرة منّا الزرع الطيّب، زرع الكلمة الحلوة والبسمة والمحبّة عا وجوهنا.
/الخوري يوسف بركات/
