بصباح هالعيد الفارح، ومع القدّيسين العظيمين بطرس وبولس، منرفعلك يا ربّ أجمل ألحان التسبيح.

من مار بطرس الرسول منستلهم الإيمان والإندفاع والمثابرة، ومن مار بولس منستمدّ الصلابة والجرأة بالرسالة اللي عاشوها واللي دعيتنا، نحنا أبناءك وبناتك، إننا نعيشا بحياتنا متلما عاشوها هالرسولان.

ومع مار بطرس ومار بولس بدنا نفتخر يا ربّ، مش بشعبيّة إكتسبناها ولا بمركز حصلنا عليه ولا بمال جمعناه ولا حتى بإنجازات طنّانة عملناها، بدنا نفتخر باننا نكون الأقوى بإحتمال المتاعب والإضطهادات، والأوَل بالتحرّق على خطايا الآخرين، والأثبت بالشهادة لكلمتك حتى لو وصلنا للإستشهاد.

ومع مار بطرس ومار بولس بدنا نفتخر يا ربّ بضعفنا اللي بتظهر فيه قدرتك، بعنفواننا وبأصلنا وبشخصنا، وكل هالشي تا تكون إنت الحيّ فينا يا ربّ.

/الخوري يوسف بركات/