كل الخلايق بتسبّحك يا ربّ بصباح هالأحد الفارح اللي فيه عم تشرق علينا من نورك.

منوقف قدّامك اليوم يا ربّ، تا نعلن مع بطرس وبولس وكل الرسل إنّك إنت حياتنا ورجانا وخلاصنا وفرحنا الدايم.

مع بطرس والرسل بدنا نشكرك على كل النِّعَم اللي فضتا وبعدك بتفيضا علينا من وقت اللي جبلتنا على صورتك ومثالك، ليوم اللي تعمّدنا فيه ولبسنا الروح القدس لليوم اللي فيه عم نوقف ونسبّحك.

معك وبرعايتك يا ربّ الحياة حلوة رغم كل صعوباتا، ومن دونك كل شي منعتبرو خسارة، إنت اللي دعيت كل واحد وواحدة مننا بأسماءنا تا نكون إلك.

يا ربّ، إنت اللي خلقتنا وأعطيتنا الحياة وإخترتنا ودعيتنا تا نكون قديسين وقديسات، رجانا إننا نكون أمينين لهالدعوة بحياتنا.

/الخوري يوسف بركات/