منرفعلك يا ربّ أجمل التسابيح وأعذب ألحان المجد بهالصباح المبارك اللي فيه عم تناجيك الخليقة كلّا.
بحياتنا معك يا ربّ، أكيد رح نواجه مصير صعب وموجع، بس لأننا منحمل إسمك على جبيننا ونورك عم ينعكس بتصرّفاتنا وقلوبنا مليانة منك، بيبقى الفرح غامرنا والسلام مرافقنا.
وشو في أجمل من إننا نتحلّى بالصبر تا نقدر نتعالى عن كل الآلام والإضطهادات، وإنت يا ربّ أجمل مثال لإلنا لمّن صبرت عالألم والصليب والموت تا تعطينا الخلاص والحياة.
بهالحياة، منرفعلك يا ربّ آلامنا، ورح نحاول نتقبّلا بفرح، تا تكون وسيلة نشاركك فيا بآلامك، ونمجّد الله الآب بكل لحظة ألم، ونستلهم الروح القدس تا يشرحلنا كلامك ويكون حاضر معنا ويقوّينا ويساعدنا بطريقة عيشنا مع الآخرين.
/الخوري يوسف بركات/
