بصباح هالنهار الفارح، منشكرك يا ربّ لأنّك عم تنعم علينا بالحياة وعم تشرق علينا نورك.
يا يسوعي الحبيب، أصعب شي بهالحياة إننا ما نكون مقبولين بمجتمعنا الضايع، وخصوصي من أقرب المقرّبين لإلنا، إن كانو أهل أو أخوة وأخوات أو أصدقاء.
والأصعب إننا نعاني الجفا لأننا عم نحاول نعيش تعاليمك ووصاياك بحياتنا وقدّام كل إنسان منلتقي فيه.
وإذا نحنا قرّرنا نمشي معك، هيدا لأننا شفنا فيك الإله والبيّ والأخ والمعلّم والصديق، وبدنا نتشبّه فيك تا نعرف طعم السلام والفرح بحياتنا.
بس يا ربّ ، الحسد والبغض والحقد عم بيحاولو يشدّونا صوب الأرض ويبعّدونا عنّك، والأنانيّة عم بتحاول تكون مشروع حياتنا، لهيك نحنا بدنا نرجع لعندك يا ربّ ونحط حالنا بين إيديك، ومسلّمين ذاتنا للروح القدس اللي بيعطينا النعمة والسلام بدل الحسد والطمع.
/الخوري يوسف بركات/
