ما في أجمل من الصباح اللي بتشرق فيه شمسك علينا يا ربّ وعالخليقة كلّا تا تبشّرنا بنهار جديد ومليان حياة.
كيف ما بدنا نحبّك يا ربّي يسوع وإنت الإله صرت إنسان تا تعطينا قيمة لذاتنا كأبناء وبنات لألله الآب؟
وشو بدنا أجمل وأهم من هيك تواضع، إنت الملك يا يسوع، جيت لعند كل واحد وواحدة منّا تا تقلّنا وتعبّرلنا قدّيش بتحبّنا حُب ما إلو حدود، حتّى بذل الذات؟
واللي بيآمن بكلامك يا يسوع، رح يعرف ويتأكّد إنّو رح يشوفك بكل إنسان بيلتقي فيه، إن كان خيّ أو صديق أو حتى مهمّش ومحتاج، هودي هنّي إخوتك الصغار.
ربّي يسوع، منشكرك لأنّك ما بتتطلّع ولا بتنطر كبر الأعمال اللي منعملا، لا بل بتتطلّع على أصغر الأعمال الصالحة اللي منعملا وبتكافينا عليا، منشكرك لأنّك ما بتستخف فينا ولا بتصنّفنا بمستويات طبقيّة، لا بل بتحبّنا متل ما نحنا بضعفنا وبقوتنا.
/الخوري يوسف بركات/
