منرفعلك يا ربّ أعذب ألحان التسبيح، بهالصباح المبارك، ومنشكرك على هالنهار الجديد اللي عطيتنا ياه بحياتنا.

يا ربّي يسوع، ليش منضلّ عم نفتش عن علامات حسّيّة تا نآمن فيك، متل هالفرّيسيّين والصدّوقيّين اللي حاولو إنّن يجرّبوك، وليش ما عم نعرف نحبّ محبّة صادقة بحياتنا؟

إنت المحبّة يا ربّ والحق والحياة، ونحنا اللي عاهدنا إننا نكون تلاميذ حقيقيّين لإلك، رح نسعى إننا نسمع كلامك ونسلّمك ذواتنا وإيماننا وحياتنا تا تدبّرن بحكمتك، وتكون كلّ أعمالنا لتمجيدك ولقداستنا.

إنت الحقيقة المطلقة يا ربّ وسعادتنا هيي فيك وحدك يا يسوع، المبدأ والغاية لحياتنا، ومعك رح نوصل لبرّ الأمان اللي فيه إنت ناطرنا ونكون معك للأبد.

/الخوري يوسف بركات/