بصباح هالنهار المجيد، واللي فيه عم تشرق علينا من نورك يا ربّ، وبتعطينا نفس جديد لحياة جديدة، منشكرك ومنسبّحك ومنمجّدك.
يا ربٍي يسوع، مين منّا ما بيقبل بإنّك الله بيناتنا، حاضر معنا دايماً، وبكل لحظة ومع كل نسمة حياة؟ مين منا ما بيآمن إنّك إنت اللي بتعطينا الحياة الأبديّة، وإنّو فيك وحدك منلاقي سلامنا ورجانا وفرحنا؟
مين منّا يا ربّ، ما بيآمن إنّو معك ما منلاقي فساد ولا منعيش الخوف ولا القلق ولا الحزن؟ مين منّا ما بيآمن إنّو بالإتحاد فيك منرتفع عن الأرضيّات ومغرياتا، ومنبعد عن الشرّ وعن كل طرقو الخادعة؟
كلنا منآمن فيك يا ربّي يسوع إنّك حياتنا وسلامنا، بس هيدا الإيمان ما رح يكفينا إذا بقينا عايشين بأنانيتنا ومستسلمين لشهواتنا ورغباتنا، لهيك بدنا نثبّت إيماننا بأفعالنا ورح نسعى إنّو تكون حياتنا تعكس إيماننا.
/الخوري يوسف بركات/
