مع كل نسمة هوا منتنشّقا، ومع نور الصباح اللي بتشرقو علينا كل يوم يا ربّ، منسبّحك ومنمجّدك يا إله السما والأرض.

كل واحد وواحدة منّا، أبناء وبنات الكنيسة، حاطت علينا مسؤولية كبيرة يا ربّ، تا نكون عم نعرف نعكس صورتك للعالم الضايع واللي عم بيفتّش عن حقيقة يآمن فيها ويتبعا، وما في غيرك يا يسوع، وحدك الحقيقة المطلقة اللي ما بتنمحا بالحياة.

وهالمسؤولية الكبيرة هيي موهبة منّك يا ربّ، ومش بقوّتنا إستحقّيناها، ولا ممكن يوم نقدر نعمل عمل واحد جيّد ومنيح إلاّ من خلال روحك القدّوس القائد والمقوّي والمدافع عنّا ضد الظلم والخطيّة.

هيدا اللي بتطلبو منّا يا ربّي يسوع، ورح نعيش على أساسو، إنّو تكون أعمالنا وأقوالنا إنعكاس لحياتنا معك وفيك يا إله الخير.

/الخوري يوسف بركات/