مع إشراقة هالصباح، منرفعلك يا إله السما والأرض ، قلوبنا وعقولنا فعل تسبيح وتمجيد وشكر لإلك على كل نعمك وعطاياك ومحبّتك.
يا ربّ، إنت اللي علّمتنا كيف نصلّي ونبني علاقة معك، علاقة الأولاد مع بيّون، علاقة الأحبّاء بعضن مع بعض، علاقة ما فيها مصلحة غير الحبّ كمان بتدعينا تا نفتح هالعلاقة على إخوتنا وأخواتنا الموجودين بحياتنا، إن كانو قراب أو بعاد.
هيدي هيّي صورة الصداقة اللي بدّك يانا نعيشا مع بعض، هالصداقة المليانة محبّة، وهالمحبّة المليانة عطاء، وهالعطاء المليان خير الآخر.
يا ربّي يسوع، إنت اللي عطيتنا ذاتك أجمل مثل بالمحبّة والعطاء، لمّن تجسّدت وصرت إنسان متلنا، وعطيتنا ذاتك زاد وزوّادة لحياتنا، نحنا كمان رح نسعى تا نكون عم نجسّد حبّك وعطاءك بعالمنا.
/الخوري يوسف بركات/
