كل ما يشرق نور الصباح، منرفعلك يا ربّ أجمل ألحان التسبيح والمجد، ومنشكرك على حبّك اللامتناهي اللي بتغمرنا فيه.

يا ربّي يسوع، الشرّ عم بيحوم حويلينا، لا بل عم بيحاول يتغلغل لعمق أعماقنا، وعم نحس بالضياع وبالتناقص بين شو بدنا وبين كيف عم نعيش.

يا ربّي يسوع، أوقات كتير منتغلّب عا إرادة الشرّير ومنستسلم للروح القدس يصوّب مسيرتنا معك، بس أغلب الأوقات عم نكون فاتحين قلوبنا للأفكار الشرّيرة إنّها تتحكّم بحياتنا وتدفعنا للغلط والبعد عنّك.

رغم هالصراع اللي عم نعيشو بحياتنا الروحيّة يا ربّ، بعدك على وعدك لإلنا بإنّك معنا وما بتتركنا، لهيك بإيمان ثابت ورجا أكيد رح نكمّل المسيرة معك، ونبعد عن الشرّ ومغرياتو بهالعالم الزايل، بدنا نشتغل على ذاتنا تا تكون قلوبنا وكل كياننا مليانين من حبّك اللامحدود.

/الخوري يوسف بركات/