صباح المحبة والسلام والرحمة والحنان، هيدا صباحك اليوم يا ربّ.
قدّيش تألّمت يا ربّي يسوع وحزنت لمّن عرفت إنّو لعازر صديقك مات بالجسد، وقدّيش مرتا ومريم زرفو الدموع لخسارتن خيون وكلّن رجا إنّو عندك وحدك الراحة والأمان.
وعند القبر الكلّ رفضو إنّن يزيحو الحجر عن الباب لأنن بعدن ما كانو عارفين ولا لامسين ولا متأكدين من قوّتك على تغيير العالم يا ربّ.
بس إنت القيامة والحياة يا يسوعنا الغالي، واللي بيآمن فيك ما بيموت الموت الأبدي، لا بل بينال الحياة الأبديّة والدايمة معك.
نعم يا يسوع، يا ربّ الأحياء والأموات، واللي بتعطي الحياة الأبديّة ، نحنا بضعفنا وخطايانا عم نحكم عا حالنا بالموت، نجينا من كل تجربة تا نبقى ثابتين معك للأبد.
/الخوري يوسف بركات/
