كل ما بيشرق نورك يا ربّ، منحسّ بدفا حبّك غامرنا، وقلوبنا بتلهف لتسبيحك وتمجيدك يا إله الكون.
اليوم، ومتل كل يوم يا ربّ، منوقّف وقفة مع ذاتنا قدام كلامك للفريسيين، ونسأل حالنا إذا نحنا حقيقة عم نكون شهود زور على دعوتنا.
هل عم نعلن مجدك بحياتنا ونكون صورة عن التلاميذ الحقيقيين اللي كل همّن هوي إنّن يعيشو محبتك وفرحك وسلامك بين الناس؟
هل عم نعيش التواضع، ونبعد عن التشاوف على الآخرين، ونكون الأداة تا نجذبن لإلك ونعرّفن عليك، أو عم نكون سبب شكّ وحجر عثرة بطريق إيمانن؟
يا ربّ، ما بدنا نكون متل علماء التوراة، نتعّب الناس بتعاليمنا اللي ما فيها إلاّ التكبّر والحسد، وإنت كل اللي بدّك ياه إنّنا نعرف نحبّ متل ما إنت حبّيتنا.
/الخوري يوسف بركات/
