كل ما بيطلع الصباح، منشوف نورك يا ربّ عم يشرق علينا وكأنّو عم بيقلّنا ويأكّدلنا إنّك دايماً معنا، منسبّحك ومنشكرك ومنمجّدك.

يا ربّ لمّن منقرا ومنسمع هالويلات اللي عم بتصبّا عالفريسيّين والكتبة وعلماء التوراة، منطرح السؤال على ذاتنا وهوّي ويننا نحنا من هالممارسات اللي كانو يمارسونها ويعيشوها؟ ويننا نحنا من علاقتنا فيك يا ربّ؟

كيف عم بتكون ممارساتنا اللي دورا إنها تعكس صورتك وبهاءك؟

هيدا هوّي الصراع اللي عم نعيشو كل يوم بحياتنا، مرّّات منكون تقليديّين ومنتمسّك باللي سمعناه وتعلمناه، ومننسى الجوهر والأساس اللي أخدناه ولبسناه بالمعموديّة، الروح القدس، ومرّّات منصير متحرّرين كتير ومننسى الجوهر اللي علمتنا ياه، وهوّي إننا نعيشك بين العالم وتكون الأساس والمرجع لحياتنا.

/الخوري يوسف بركات/